Írska lögreglan hefur heitið því að þeim sem standa á bakvið morðið á hinum 17 ára gamla Keane Mulready-Woods, sem hafði verið saknað í nokkra daga, verði refsað. Leitin að honum breyttist í morðrannsókn eftir að líkamshlutar fundust í íþróttatösku í Coolock hverfinu í Norður-Dublin. Síðar fundust fleiri líkamshlutar í brenndum bíl í Drumcondra. Lögreglan lokaði svo húsi í Drogheda, en Keane var þaðan, og lýsti því yfir að húsið væri vettvangur glæps.
Samkvæmt írska ríkissjónvarpinu (RTE) hafði fórnarlambið verið tengt fíkniefnasölu og hafði verið hótað því að vera rænt, drepið og hlutað niður.
Írski forsætisráðherrann, Leo Varadkar, hefur heitið því að aðstoða lögregluna og að hún muni fá allt sem hún þurfi og að þeir sem bera ábyrgð á morðinu verði sóttir til saka. Forsætisráðherrann bætti við að þetta væri sennilega hryllilegasta morð sem hann hefði heyrt um og það væri sérstaklega hræðilegt að um 17 ára ungling hefði verið að ræða.
Í yfirlýsingu frá írsku lögreglunni segir að þetta sé fólskuleg og grimmileg árás á barn og að hún sé fullkomlega óásættanleg í lýðræðisþjóðfélagi. „Það má ekki gleyma því að Keane var barn, ungur drengur sem var að reyna að fóta sig í lífinu, hann hefur nú misst lífið og fjölskylda hans hefur misst son sinn og bróður“.
