Tim Cook, sem er forstjóri Apple, á væntanlega fyrir salti í grautinn og jafnvel mjólk út á hann. Hann fékk 125 milljónir dollara í laun á síðasta ári en það svarar til 15,3 milljarða íslenskra króna. Þetta er lægri upphæð en hann fékk 2018 en þá fékk hann sem svarar til um 16,7 milljarða íslenskra króna. Ástæðan fyrir „launalækkuninni“ er að hann fékk minni bónus á síðasta ári en 2018 þar sem rekstrarafkoma Apple var ekki eins góð og 2018.

Bloomberg skýrir frá þessu. Segir miðillinn að 2018 hafi Cook fengið sem svarar til 1,4 milljarða íslenskra króna í bónusgreiðslur en á síðasta ári var upphæðin aðeins lægri eða sem svarar til um 940 milljóna íslenskra króna.

Sumar af vörum fyrirtækisins hafa selst vel á undanförnum árum, til dæmis AirPods þráðlausu eyrnatólin en á sama tíma hefur salan á iPhone dregist saman. Það er einmitt þessi minnkandi sala sem veldur því að bónusgreiðslan var lægri á síðasta ári.