Árásir á gyðinga og gyðingahatur eiga stóran þátt í að sífellt fleiri gyðingar pakka saman föggum sínum og flytja frá Vesturlöndum til Ísrael. Á síðasta ári fluttu 30.087 gyðingar til Ísraels en það var sjö prósenta aukning frá árinu áður. Þetta kemur fram í tölum frá samtökunum The Jewish Agency for Israel sem skráir tilflutning gyðinga til landsins.

Kristeligt Dagblad skýrir frá þessu. Fram kemur að 3.967 af þessum gyðingum hafi komið frá Vestur-Evrópu, flestir frá Frakklandi. Margar árásir hafa verið gerðar á gyðinga í Frakklandi á undanförnum árum. Í síðustu viku voru hakakrossar málaðir á 100 legsteina gyðinga í kirkjugarði í Strassborg.  Emmanuel Macron, forseti, sagði af því tilefni að gyðingahatur væri glæpur.

Samkvæmt skýrslu, sem ESB gaf út á síðasta ári, telja níu af hverjum tíu gyðingum að gyðingahatur hafi aukist í Evrópu á síðustu fimm árum. Rúmlega 16.000 gyðingar í 12 ESB-ríkjum tóku þátt í könnuninni.