Borgarstjórn Reykjavíkur samþykkti í dag samkomulag sveitarfélaga og ríkisins um uppbyggingu samgönguinnviða á höfuðborgarsvæðinu næstu 15 árin. Þar með er komið grænt ljós á Borgarlínu af hálfu borgarinnar. Samkvæmt frétt RÚV lýsti Vigdís Hauksdóttir, borgarfulltrúi Miðflokksins, yfir mikilli andstöðu við samkomulagið. Það fæli í sér rándýra óvissuferð á kostnað skattgreiðenda.
Dagur B. Eggertsson borgarstjóri lýsir yfir mikilli ánægju með samkomulagið í nýrri Facebook-færslu. Segir hann að það komi til með að auka lífsgæði og bæta umferð í höfuðborginni. Segir Dagur jafnframt að klofningur innan Sjálfstæðisflokksins um málið sé augljós:
Borgarstjórn samþykkti rétt í þessu samkomulag sveitarfélaga og ríkisins um metnaðarfulla uppbyggingu samgönguinnviða til næstu 15 ára á höfuðborgarsvæðinu. Þetta eru mikil og ánægjuleg tímamót. Óvissu um Borgarlínu er eytt. Lífsgæði í og umferð í borginni mun stórbatna. Miklabraut mun fara í stokk frá Kringlusvæði að Snorrabraut og hjólastígakerfi höfuðborgarsvæðisins mun verða fyrsta flokks svo fátt eitt sé nefnt. Samkomulagið þýðir að græn og jákvæði umbreyting borgarinnar verður að veruleika. Sérstaka athygli vakti að Eyþór Arnalds var eini borgarfulltrúi Sjálfstæðisflokksins sem tók til máls og lagði sérstaka lykkju á leið sína til að hnýta í það á sérstaklega ósanngjarnan hátt að fjármálaráðherra og formaður Sjálfstæðisflokksins væri að selja Keldnaland tvisvar. Klofningurinn innan flokksins var nánast áþreifanlegur.