Styrmir Gunnarsson, fyrrverandi ritstjóri Morgunblaðsins, fer yfir stöðu stjórnmálaflokkanna nú þegar kjörtímabilið er hálfnað:
„Staðan á miðju kjörtímabili er áhyggjuefni fyrir stjórnarflokkana, þótt ekki verði annað sagt en að þeim hafi tekizt býsna vel að tryggja efnahagslegan stöðugleika. Vextir fara lækkandi og verðbólgu er haldið í skefjum. Áhyggjuefnið fyrir stjórnarflokkana er hins vegar undirliggjandi vandi af öðrum ástæðum. Orkupakkinn er eitt þeirra. Annað tengist Kjararáðinu sáluga,“
segir Styrmir og nefnir niðurstöður kannanna:
„…þar sem Sjálfstæðisflokkur virðist búinn að missa helming hefðbundins fylgis síns, Framsóknarflokkurinn stríðir við tilvistarvanda og VG býr við erfiðan mótvind. Það er þó jákvætt fyrir Sjálfstæðisflokk, að vísbendingar eru um að forystusveit hans sé að vakna upp við vondan draum og átta sig á að kosningar vinnast ekki með því að loka augunum fyrir því, sem að flokknum snýr. Raunsætt mat á þeirri stöðu er fyrsta skref til þess að snúa dæminu við. En þessa stundina hefur Miðflokkurinn meðvind,“
segir Styrmir en Miðflokkurinn mælist nú stærstur stjórnarandstöðuflokka og er næst-stærsti flokkurinn á þingi, miðað við könnun MMR, hvar hann fékk tæplega 15 prósenta fylgi. Munurinn á Miðflokki og Samfylkingu mældist þó innan skekkjumarka.
