Í kvöld gefst áhugasömum tækifæri til að sleppa tökunum og dansa í þágu góðgerðarmála.
Það er Kraftur ásamt Yoga Shala og Yoga Moves sem stendur fyrir viðburðinum. Tómas Oddur, jógakennari segir þetta einstakan núvitundarviðburð. „Kraftur er félag ungs fólks sem greinst hefur með krabbamein og aðstandendur þeirra. Hulda Hjálmarsdóttir, formaður félagsins kemur alltaf til mín í Yoga moves en hún kom að máli við mig og vildi fá mig í þetta verkefni. Við erum sem sé að fagna tuttugu ára afmæli Krafts og allir þeir sem koma fram gefa vinnuna sína. Miðaverð er 3900 krónur og rennur allur ágóðinn til Krafts.
Þetta er því kjörið tækifæri að koma saman, fá geggjaða útrás í dansi, jóga, hugleiðslu og tónheilun en styrkja á sama tíma gott málefni.
Ásamt mér mun DJ Margeir stýra tónlistinni, YAMAHO kemur fram og Ingibjörg Stefánsdóttir jógakennari leggur sitt lóð á vogaskálarnar. Lífið er núna eru einkennisorð Krafts og minnir okkur á að gleðjast yfir þeim sigri að fá að lifa í andartakinu „núna“. Er lífið ekki þess virði að við gefum okkur tíma og rými til að fagna því sérstaklega, eitt andartak?”
Tómas segir þátttakendur þurfa að mæta í þægilegum fötum og hafa jógadýnu meðferðist. „Við leiðum ykkur svo inn í núið og vellíðan. Við byrjun á því að setja tóninn fyrir kvöldið, tökum svo öndun og hugleiðslu.
Í gegnum seiðandi tóna förum við svo inn í nærandi jógaflæði sem byggist svo upp í frjálst danspartí.
Þar fá allir tækifæri til að sleppa tökunum, dilla sér og dansa en aðal markmiðið er auðvitað bara að hafa gaman,“ segir Tómas og bætir við að ásamt því verði gerðar ýmsar æfingar. „Við förum í allskonar stöður og leiki sem hjálpa okkur að komast í grúvið en við erum með frábæra plötusnúða sem eru þrælvön að halda uppi stuðinu. Dansinn er nefnilega eitt það öflugasta tól sem við höfum til að stuðla að líkamlegri og andlegri heilsu. Ég mæli því heilshugar með að sem flestir komi í kvöld, mættu í núið og styrktu gott málefni í leiðinni.“
Núvitundarpartíð fer fram í Norðurljósasal Hörpu og hefst klukkan 20:00, áhugasamir geta keypt miða á harpa.is.
