Sjávarútvegsráðherra hefur svarað fyrirspurn Ingu Sæland, formanns Flokks fólksins, varðandi kostnað og ávinning skyndi- og svæðalokana til verndunar smáfiski undanfarin 10 ár. Þar kemur fram að á ársgrundvelli séu um 127 skyndilokanir, og auglýsingakostnaðurinn vegna þeirra sé um 20 milljónir yfir sama tímabil. Síðustu þrjú árin er meðaltalskostnaður um 1.8 milljónir.

Hafa takmarkað gildi

Slíkar lokanir eru framkvæmdar til að koma í veg fyrir skaðlegar veiðar og til að takmarka brottkast. Í svarinu er hinsvegar tekið fram að skyndilokarnir hafi takmarkað gildi þegar veiðihlutfallið er hóflegt, líkt og raunin sé í flestum bolfisktegundum:

„Þá kemur fram í svari Hafrannsóknastofnunar, með vísan í nýlega ritrýnda grein, að skyndilokanir séu gagnlegar til verndar smáfiski þegar veiðihlutfall er hátt, en sé veiðihlutfall hóflegt líkt og nú er í flestum bolfisktegundum hafi skyndilokanir takmarkað gildi. Hafrannsóknastofnun telur þó ekki ráðlegt að fella öll mörk niður og hverfa frá lokunum svæða ef smár fiskur veiðist. Skynsamlegt sé að hafa aðhald og stöðva veiðar á svæðum ef óhóflega er veitt af ungviði. Stofnunin hefur lagt til að breyta viðmiðunarmörkum, þ.e. rýmka þau, fyrir þorsk, ýsu og ufsa, en stofnunin telur ekki þörf á að breyta viðmiðunarmörkum í öðrum tegundum að svo stöddu.“