Hinum þekkta og vinsæla fjölmiðlamanni Hjörvari Hafliðasyni var í sagt upp í gær frá störfum hjá Sýn, fjölmiðlahluta Vodafone. Tólf öðrum starfsmönnum var sagt upp, þar af tveimur sjónvarpsfréttamönnum á Stöð 2. Hjörvar tjáði sig um brottreksturinn við DV í gær.

Dyggur aðdáandi úvarpsþáttarins Brennslunnar, á FM957, leggur til að hlustendur borgi laun Hjörvars.

Hann stingur upp á þessu í Facebook-hópnum Brennslu Tips, sem er hópur fyrir hlustendur Brennslunnar.

„Ef einungis er um peninga að ræða, má benda á að ef um 30 þúsund manns hlusta á þáttinn þá kostar ekki nema 50 krónur á mánuði eða um 600 krónur á ári fyrir hvern hlustanda að halda Hjörvari [í þættinum],“ segir hann.

„[Ég] reikna með að hann vilji ekki fá minna en 1,5 milljón á mánuði fyrir „comeback“ þó það sé varlega reiknað. Samkvæmt mínum útreikningum yrði þetta einn besti 600 kall sem ég myndi eyða um ævina. Hægt væri að stofna Go Fund Me eða viðlíka síðu og ef takmarki yrði náð, að þá myndi þetta ná í gegn. Hjörvar Hafliðason, Kjartan og Richard er þetta alveg úr myndinni? Mikill Missir fyrir íslenskt útvarp.“

Færslan var sett inn í hópinn fyrir tveimur tímum síðan og hafa 24 manns hafa líkað við hana. Enginn af Brennslustrákunum hafa skrifað við færsluna og tjáð sig um hugmynd hlustandans.