Ímyndaðu þér að þú sjáir mynd af aflimuðum fæti föður þíns utan á sígarettupakka þar sem fóturinn er sýndur til að leggja áherslu á hætturnar sem fylgja reykingum. Þetta væri eflaust ekki þægileg upplifun en það er einmitt þetta sem sextugur albanskur karlmaður, sem býr í Metz í Frakklandi, lenti nýlega í. Það gerir málið enn undarlegra að fóturinn var ekki tekinn af föður mannsins vegna reykinga heldur vegna skotáverka sem hann hlaut 1997.

BBC skýrir frá þessu. Maðurinn keypti sér sígarettupakka í Lúxemborg og sá þá mynd af fæti föður síns utan á pakka. Honum brá mikið sem og fjölskyldunni því myndin var notuð án þeirra vitundar.

Lögmaður fjölskyldunnar, Antoine Fittante, hefur nú sett sig í samband við framkvæmdastjórn ESB til að reyna að komast að hvað snýr upp og niður í þessu undarlega máli. Hann segir að sérhvert ör sé auðþekkjanlegt og sérstakt. Maðurinn sé einnig með brunasár á hinum fætinum og því verði sérfræðingar ekki í erfiðleikum með að staðfesta að þetta séu myndir af fæti mannsins. Hann segir að skjólstæðingur hans telji sig illa svikinn og að lítið hafi verið gert úr honum með því að nota fötlun hans til aðvörunar á sígarettupakka.

The Guardian segir að framkvæmdastjórn ESB hafi vísað því á bug að myndin sé af manninum og segi að það sé algjör tilviljun að ör og brunasár séu eins.