Helgi Hrafn Gunnarsson, þingmaður Pírata, segist fá í magann þegar hann heyrir sagt að Birgittu Jónsdóttur hafi verið ýtt úr flokknum. „Nei, Birgitta Jónsdóttir fékk bara ekki að ráða til tilbreytingar. Og þegar Birgitta Jónsdóttir fær ekki að ráða þá upplifir hún ekki höfnun heldur árás og hún svarar þannig. Ég treysti henni ekki til að halda trúnað, hún býr til ósætti frekar en sættir og stærir sig af því, hún krefst þess sífellt að hennar álits sé leitað og hún leitar ekki álits annarra, hún grefur undan samherjum sínum ef hún sér af þeim ógn, hún gerir lítið úr samherjum sínum…“

Þetta aðeins lítið brot úr eldræðu Helga Hrafns þar sem hann talaði gegn því að Birgitta Jónsdóttir fengi sæti í trúnaðarráði flokksins. Vefritið Viljinn birti upptöku af fundinum og er sú upptaka tiltæk á Youtube. Þess vegna birtum við hana hér líka að neðan.

Helgi Hrafn segir mjög reiðilega að þetta sé áralöng reynsla sín af því að vinna með Birgittu Jónsdóttur.

Yfirgnæfandi meirihluti fundarmanna á fundi trúnaðarráðs flokksins greiddi atkvæði gegn því að Birgitta fengi sæti í ráðinu. Birgitta er sögð hafa farið grátandi af fundinum.