Líkt og Eyjan greindi frá á þriðjudag, þá taldi Menningar-, íþrótta- og tómstundaráð Reykjavíkur það ótækt að veita Magnúsi Má Kristinssyni leyfi fyrir pylsuvagni við Sundhöll Reykjavíkur á dögunum, þó svo fordæmi væru fyrir slíkri veitingasölu við Sundhöll Reykjavíkur hér áður fyrr, sem og að pylsuvagn eða veitingasala væri við Laugardalslaug og Vesturbæjarlaug. Ástæðan sem gefin var var óljós, það var einfaldlega ekki talið „heppilegt“ og bent á að í nágrenninu væru kaffihús, veitinga- og skyndibitastaðir.

Bévítans forræðishyggja

Kolbrún Baldursdóttir, oddviti Flokks fólksins, segir að um forræðishyggju meirihlutans sé að ræða, sem hlutist til um að stjórna lífstíl borgarbúa:

„Þetta er nú meiri bévítans forræðishyggjan í þessum meirihluta. Nú getur maður ekki fengið sér pylsu lengur eftir sund í Sundhöllinni. Hverra hagsmuna er verið að gæta hér? Hversu langt ætlar þessi meirihluti í borgarstjórn að ganga að skipta sér af lífi og lífsstíl borgarbúa?“

Kolbrún lagði fram bókun um málið sem lagt var fram í fundargerð í borgarráði í dag:

„Flokkur fólksins skilur ekki afstöðu meirihlutans að banna pylsuvagninn við Sundhöllina. Telur það eins og sagt er „ ekki heppilegt“. Hvað er eiginlega átt við með því, ekki heppilegt? Hvernig getur það verið „ekki heppilegt“ að hafa pylsuvagn fyrir framan Sundhöllina? Þetta er enn eitt dæmi um forræðishyggju flokka meirihlutans. Þeir vilja ekki aðeins ráða samgöngumáta fólks heldur einnig hvort þeir fái sér pylsu eftir sund í Sundhöllinni sem hægt hefur verið að gera árum saman.“

Sjá einnig: Reykjavíkurborg telur „gourmet“ pylsur frá Michelinstjörnukokki óheppilegar fyrir sundlaugagesti – „Sorglegt að þetta hafi ekki náð í gegn“