Óhætt er að segja að ferill kanadíska leikarans Keanu Reeves hafi verið á mikilli siglingu undanfarin misseri. Reeves, sem er 54 ára, var ein skærasta stjarnan í Hollywood á tíunda áratug liðinnar aldar en í kjölfarið hvarf hann allt að því úr sviðsljósinu.

En nú er Reeves heldur betur farinn að láta til sín taka og hefur hann til að mynda fengið mikið lof fyrir leik sinn í þríleiknum um John Wick.

Marvel, sem framleitt hefur hverja ofurhetjumyndina á fætur annarri undanfarin ár, hefur mikið reynt að fá Reeves til að leika í myndum fyrirtækisins. Þetta sagði Kevin Feige, forseti Marvel Studios, í viðtali við vefinn Comicbook.com á dögunum.

„Við tölum við hann fyrir hverja einustu mynd sem við gerum. Ég veit ekki hvenær eða hvort hann slæst í lið með Marvel Comics Universe,“ segir hann og bætir við að hann sé spenntur fyrir því að vinna með Reeves.

Eftir að viðtalið birtist fór orðrómur á kreik um að Reeves myndi leika í Marvel-myndinni The Eternals ásamt Angelinu Jolie.

Reeves er þó ekki eini stórleikarinn sem Marvel hefur verið að eltast við því Feige nefndi einnig að fyrirtækið hefði oft reynt að fá Jake Gyllenhaal um að taka að sér hlutverk í myndum Marvel. Gyllenhaal tók að lokum að sér hlutverk en hann fer með hlutverk Mysterio í myndinni Spider-Man: Far From Home sem kemur í kvikmyndahús þann 2. júlí næstkomandi.