Raymond Verheijen, fyrrum aðstoðarþjálfari Wales, er mjög umdeildur eftir ummæli sem hann lét falla á dögunum.

Verheijen tjáði sig um kvennaboltann á Twitter og sagði á meðal annars að horfa á hann væri eins og að fylgjast með grasi vaxa.

Einnig talaði Verheijen um að risaeðlur úr karlaboltanum væru að þjálfa liðin og að gæðin væru einfaldlega ömurleg.

Phile Neville, landsliðsþjálfari Englands, hefur nú svarað Verheijen sem hefur þurft að þola gagnrýni eftir ummælin.

,,Hann situr þarna og talar eins og hann viti allt – ég hef samt aldrei séð hann vinna í hæsta gæðaflokki,“ sagði Neville.

,,Hann fær ekki starf. Hann hefur gagnrýnt þjálfara eins og Alex Ferguson, Arsene Wenger, Mauricio Pochettino og Jurgen Klopp.“

,,Hann hraunaði líka yfir David Moyes þegar ég vann með honum. Við hliðina á nafninu hans á Twitter þar má sjá egg.“

,,Farðu út og finndu þér starf Raymond, farðu og vinndu eitthvað. Hann er bara stríðsmaður á lyklaborðinu.“