Sunday Times birti á dögunum frétt þess efnis að hafinn væri undirbúningur að heimsókn Donalds Trump til Bretlands sem fyrirhuguð er í október. Þar kom fram að tekið sé mið af hræðslu Trumps við að ganga niður tröppur og því verði reynt eftir megni að hafa móttökur og athafnir á jarðhæðum. Fréttir af þessum ótta Trumps fengu byr undir báða vængi þegar hann sást grípa í hönd Theresu May í opinberri heimsókn hennar til Bandaríkjanna en þá voru þau að ganga niður tröppur. Auk þess að hafa beyg af tröppum er Trump sagður mjög sýklahræddur og lítt hrifinn af að heilsa með handabandi, sem hann þarf þó að gera ansi mikið af stöðu sinnar vegna. Fréttaritari CNN spurði eitt sinn talsmann Hvíta hússins um hræðslu Trumps við að ganga niður tröppur og fékk það svar að spurningin væri fáránleg.
Árið 2014 beindi Trump viðvörunarorðum á Twitter til Baracks Obama sem hafði hlaupið niður landgang forsetaflugvélarinnar. „Passaðu þig að detta ekki,“ skrifaði hann.
