Úrslitaleikur Evrópudeildarinnar fór fram í gær en grannalið Arsenal og Chelsea áttust við í Baku. Fyrri hálfleikurinn í gær var engin frábær skemmtun og fengum við engin mörk.

Það fór allt af stað í seinni hálfleik og komst Chelsea yfir með laglegu skallamarki Olivier Giroud. Stuttu seinna var staðan orðin 2-0 fyrir þeim bláu en Pedro skoraði þá laglegt mark eftir skyndisókn. Eden Hazard skoraði svo þriðja mark Chelsea ekki löngu síðar úr vítaspyrnu og útlitið svart fyrir Arsenal. Alex Iwobi lagaði stöðuna fyrir Arsenal með frábæru marki áður en Hazard bætti við sínu öðru og gulltryggði Chelsea 4-1 sigur.

Arsenal mun því leika í Evrópudeildinni á næstu leiktíð eftir að hafa hafnað í fimmta sæti úrvalsdeildarinnar.

Eiður Smári Guðjohnsen var sérfræðingur hjá BT Sport á leiknum, samkvæmt vef Metro þá lét hann Mesut Özil, launahæsta leikmann Arsenal heyra það eftir leik.

,,Það var eins Özil hefði labbað eins hægt og hann gæti af velli í stöðunni 4-1, til að láta fólk standa upp og klappa fyrir sér,“ sagði Eiður Smári og var óhress með látbragð Özil en Metro fjallar um málið.

,,Ég biðst afsökunar, en ég myndi skammast mín og setja hausinn niður, og spretta af velli. Hann er frábær leikmaður, með mikla hæfileika. Sem þjálfari gæti ég aldrei horft á svona í mínu liði.“