Brynjar Níelsson, þingmaður Sjálfstæðisflokksins, syrgir nú lát sænska dægurlagasöngvarans Svens-Ingvars, en hann lést síðastliðinn miðvikudag, 74 ára að aldri. Brynjar lýsir því á Facebook-síðu sinni að aðdáun hans á söngvaranum hafi ekki verið vandkvæðalaus. Þannig hafi eiginkona hans, Arnfríður Einarsdóttir, megnustu andúð á tónlistinni og hann hafi þurft að fela geisladiskana fyrir henni. Þá neiti Arnfríður að dansa við Brynjar undir tónlistinni, ekki einu sinni við hið fræga lag Jag ringer på fredag þar sem sungið er: „Segðu ekki nei, segðu kannski, kannski, kannski.“ Arnfríður segi bara þvert nei.