Svo virðist vera sem barnaníð hafi þrifist í óhugnanlegum mæli svo áratugum skiptir í bandarísku skátahreyfingunni. Þetta segir Jeff Anderson, lögmaður, sem fer með fjölmörg mál fyrrverandi liðsmanna skátahreyfingarinnar. Skjólstæðingar hans eiga það sameiginlegt að hafa orðiðfyrir grófu kynferðisofbeldi þegar þeir voru börn í skátunum..
Í frétt Fox kemur fram að rannsókn Andersons og teymis hans hafi leitt í ljós að meintir gerendur á árunum 1944 til 2016 hafi verið 7.819 talsins. Fórnarlömbin á sama tímabili hafi verið vel yfir tólf þúsund.
Anderson kynnti þetta á blaðamannafundi í vikunni. Hann bætti við að það versta væri að bandaríska skátahreyfingin hafi haldið hlífiskildi yfir meintum gerendum og haldið nöfnum þeirra leyndum. Þó að meintum gerendum hafi verið meinað að starfa í skátunum hafi þeir getað haldið lífi sínu áfram svo til óáreittir og unnið hefðbundin störf, til dæmis í kringum börn.
Anderson á von á því að mál skjólstæðinga hans komi til kasta dómstóla síðsumars.