Einar Kristjánsson einkaþjálfari, styrktarþjálfari og eigandi AlphaGym segir feður þurfa að taka sig á og sýna öðrum ungum karlmönnum gott fordæmi.
„Við verðum að ala upp menn sem taka frumkvæði og persónulega ábyrgð. Við verðum að ala upp menn sem eru tilbúnir að aðstoða aðra og standa upp fyrir því sem er rétt,“ segir Einar í færslu á Facebook. Einar gaf DV góðfúslegt leyfi til að birta pistillinn. Hann deilir reglulega alls konar fróðleik um heilsu og næringu á Facebook-síðu sinni.
„Pabbar, við þurfum að tala saman. Ungir karlmenn eru á hraðri niðurleið í samfélaginu. Ungir karlmenn eru langt á eftir á alltof mörgum vígstöðum (námi, andlegri líðan og fleira),“ segir Einar.
Hann segir lýsandi dæmi vera skilaboð sem hann fær í hverri viku frá mæðrum eða kærustum ungra karlmanna á aldrinum 18-28 ára. „[Þær] eru annað hvort að kaupa eða segja upp þjónustu FYRIR viðkomandi. Reglulega fæ ég skilaboð frá foreldrum sem eru að sækja um vinnu FYRIR 20-30 ára gamla syni sína,“ segir Einar og heldur áfram:
„Af hverju taka ekki fleiri ungir karlmenn frumkvæði eða axla persónulega ábyrgð? Af hverju haga ungir karlmenn sér eins og litlir strákar langt fram eftir aldri? Sumir myndi segja að þetta sé „femínista samfélaginu“ að kenna. En það er bullshit og fórnarlambs hugsunarháttur.
Þetta skrifast að miklu leiti á okkur pabbana. Foreldri af sama kyni getur haft gríðarleg áhrif á framþróun og mótun einstaklings.
Við þurfum að taka okkur á. Við verðum að hjálpast að við að ala upp karlmenn, ekki stráka. Við þurfum að undirbúa þá betur fyrir lífið. Við verðum að ala upp nútíma herramenn sem axla ábyrgð.
Við verðum að ala upp menn sem vita fyrir hvað þeir standa, við verðum að kenna þeim að lifa eftir grunngildum sem hjálpa þeim að ná árangri.
Við verðum að ala upp menn sem taka frumkvæði og persónulega ábyrgð. Við verðum að ala upp menn sem eru tilbúnir að aðstoða aðra og standa upp fyrir því sem er rétt. Við verðum að ala upp karlmenn sem vilja sigra, skapa keppnisskap (og kunna að tapa sem herramenn). Við verðum að ala upp menn sem geta komið með aukið verðmæti í samfélagið okkar og verið sjálfbjarga leiðtogar sem þjóna öðrum á jákvæðan hátt.
En ÞÚ verður að setja standardinn. Settu háan standard og sýndu fordæmi – „lead by example.“
Það er fylgst með hverju einasta skrefi sem þú tekur. Sýndu fordæmi með þínum eigin ákvörðunum.
Vertu leiðtogi sem sér fyrir og verndar fólkið í kringum sig, stattu upp fyrir því sem er rétt, berðu virðingu fyrir öðrum, axlaðu ábyrgð, skapaðu samfélaginu verðmæti og þjónaðu öðrum.“