Búið er að hressa rækilega upp á myndbönd af kjarnorkutilraunum Bandaríkjamanna í Nevada-ríki. Bandaríkjamenn sprengdu margar tilraunasprengjur í Nevada á árunum 1951 til 1992, eða alls 928.

Myndbandið sem sést hér að neðan var tekið árið 1953 og sýnir það afleiðingar nokkurra kjarnorkjusprengja, meðal annars 15 kílótonna sprengju og 32 kílótonna sprengju sem fékk viðurnefnið Dirty Harry.

Myndböndin voru birt á YouTube-rásinni Atom Central en þau eru í eigu bandaríska hersins. Sprengjurnar voru sprengdar í Nye-sýslu í Nevada á tímabilinu 17. mars 1953 til 4. júní það ár.

Óhætt er að segja að sprengjurnar hafi verið öflugar eins og myndbandið hér að neðan ber með sér. Lakkið á þremur bifreiðum nánast fuðrar upp vegna hitans frá sprengingunni áður en höggbylgjan sem fylgir á eftir feykir þeim í burtu.

Eins og að framan greinir voru sprengdar 928 kjarnorkusprengjur í Nevada á sínum tíma, flestar voru sprengdar neðanjarðar.