Þetta segir Linda Pétursdóttir, athafnakona og fegurðardrottning, í viðtali í Fréttablaðinu í dag. Ekki alls fyrir löngu bárust fréttir af því að Linda hefði fundið ástina í örmum Kanadamannsins Jamie Greig. Þó að nýlega hafi verið greint frá sambandi þeirra hafa þau verið saman undanfarin þrjú ár.
„Ég hef haldið sambandinu prívat í að verða þrjú ár, því mér finnst gott að halda einkalífinu fyrir mig. Mér tókst vel að halda því leyndu allan þennan tíma,“ segir Linda í viðtalinu en hún er nú búsett í Kaliforníu í Bandaríkjunum. Áður en þau fluttu þangað bjó Jamie með Lindu á Íslandi og hafa þau sett stefnuna á að flytja til Vancouver í Kanada áður en langt um líður.
Linda er augljóslega hamingjusöm með Jamie, hún segir að lífið með honum sé áreynslulaust og þau séu bestu vinir. „Lífshlaup okkar hefur verið ansi ólíkt en leiðir okkar lágu fyrst saman þegar ég bjó í Vancouver fyrir um fimmtán árum,“ segir hún.
En hvernig lágu leiðir þeirra saman?
Í viðtalinu kemur fram að Jamie sé frændi fyrrverandi nágrannakonu Lindu sem kynnti þau. Þau vissu því af hvort öðru en voru ekki beint í miklum samskiptum, ekki fyrr en Linda leitaði til Jamie um aðstoð.
„Stjarna, tíkin mín, var í pössun í Kanada á meðan beðið var eftir að koma henni heim í einangrun, hann fór og bjargaði henni fyrir mig en það er töluvert lengri saga,“ segir hún en í kjölfarið leiddi eitt af öðru, þau fóru að tala meira saman og segir Linda að smám saman hafi hún fallið fyrir honum.
Jamie vinnur fyrir Landhelgisgæslu Kanada og segir Linda að hann sé eitt mesta ljúfmenni sem hún þekkir. „Stór og karlmannlegur, listakokkur og hugsar vel um mig, Ísabellu og hundana okkar. Ég er algjörlega afslöppuð og ég sjálf með honum, við hlæjum mikið saman og það er oftast gaman hjá okkur,“ segir Linda í viðtalinu sem má lesa í heild sinni hér.
