Það er ekki alltaf þakklæti sem fólk fær þegar það reynir að aðstoða aðra. Þessu fengu tvær manneskjur að kynnast í Kungsbacka í Svíþjóð í gærkvöldi. Fólkið ók fram á bíl sem hafði lent utan vegar. Eins og góðu fólki sæmir stoppaði það til að kanna hvort slys hefðu orðið á fólki og hvort hægt væri að aðstoða.

Kona, sem hafði verið við stýri á bílnum sem fór út af, gerði sér þá lítið fyrir og settist undir stýri á bíl fólksins og ók af stað. Hún lét það ekki stöðva sig að önnur manneskjan var enn í bílnum.

Hún ók síðan sína leið með farþegann. Lögreglunni var strax tilkynnt um þetta og komst hún fljótlega á spor konunnar. Þegar henni voru gefin merki um að stöðva sinnti hún því ekki og reyndi að aka á lögreglubílinn. Allan tímann var farþeginn í bílnum.

Lögreglunni tókst þó að stöðva konuna og handtaka hana. Hún er grunuð um að hafa verið undir áhrifum fíkniefna.

Enginn meiddist.