Leikarinn Richard Gere og eiginkona hans, spænski aðgerðarsinninn Alejandra Silva, eignuðust sitt fyrsta barn saman á dögunum, lítinn dreng sem kom í heiminn á ónefndu sjúkrahúsi í New York.
Richard á fyrir soninn Homer, nítján ára, með fyrrverandi eiginkonu sinni, Casey Lowell. Alejandra á soninn Albert, sex ára, með fyrrverandi eiginmanni sínum, Govind Friedland. Richard verður sjötugur á árinu á meðan Alejandra fagnar 36 ára afmæli sínu nú í febrúar.
Leikarinn og aðgerðarsinninn gengu í það heilaga í apríl í fyrra eftir rúmlega þriggja ára samband. Sögusagnir fóru á kreik um að Alejandra væri ólétt í ágúst í fyrra. Mánuði síðar staðfesti hún orðróminn á Instagram.
„Sérstakt augnablik fyrir nokkrum mínútum. Við fengum blessun fyrir kraftaverkið okkar sem er á leiðinni,“ skrifaði hún af mynd af leikaranum, sem er búddatrúar, og Dalai Lama þar sem sá síðarnefndi setti hendur sínar á maga Alejöndru.
„Við gátum ekki tilkynnt þetta áður en við sögðum Dalai Lama frá,“ bætti hún við, en myndina er ekki lengur að finna á Instagram.
