Þegar Michael Carroll ólst upp á heimili sínu í rólegu hverfi í Lake Grove í New York-ríki hafði hann bara móður sína til treysta á. Móðir hans sagði honum að faðir hans, George Carroll, hefði gengið út af heimilinu árið 1961 og yfirgefið fjölskylduna.

Það var ekki fyrr en mörgum árum síðar að óhugnanlegur sannleikurinn kom í ljós. George hafði ekkert yfirgefið fjölskylduna heldur var hann grafinn í kjallara hússins.

NBC News fjallar um þetta óhugnanlega mál og segir að lögreglan hafi nú hafið morðrannsókn á málinu.

Það var þann 30. október síðastliðinn að Michael og tveir fullorðnir synir hans hafi fundið líkamsleifarnar í kjallara hússins. Eins og kannski gefur að skilja var ekkert nema beinagrind að finna í gröfinni og því þurfti að leita á náðir DNA-tækninnar til að fá úr því skorið hver væri í gröfinni.

Niðurstaðan liggur nú fyrir og leikur enginn vafi á því að um föður Michaels er að ræða. Niðurstaða réttarmeinafræðings leiddi í ljós að George hafði hlotið mikla höfuðáverka sem líklega drógu hann til dauða.

Michael var aðeins átta mánaða þegar faðir hans hvarf. Hann keypti húsið af móður sinni á níunda áratug liðinnar aldar en hún lést árið 1998.

Í samtali við bandaríska fjölmiðla segir hann að þegar hann var ungur drengur hafi hann ekki átt að tala um föður sinn. Hann segir að hann hafi heyrt ýmsar samsæriskenningar um föður sinn þegar hann ólst upp, ein var að hann væri grafinn í kjallaranum sem reyndist vera raunin.

Michael segist hafa grun um það hver varð föður hans að bana. Aldrei var tilkynnt um hvarf hans til lögreglu og segir Michael að þeir sem báru ábyrgð á morðinu séu löngu dánir. George var hermaður og barðist meðal annars í Kóreustríðinu. Jarðneskum leifum hans verður að líkindum komið fyrir í Calverton-kirkjugarðinum.