Garðyrkjumenn gleðjast hefði getað verið yfirskriftin á skemmtilegu samkvæmi sem fyrirtækið Sælandsgarðar hélt á laugardaginn. Þá fögnuðu Eiríkur Ómar Sæland og fjölskylda hans ýmsum tímamótum: Eiríkur hélt upp á sextugsafmæli, veislan var jafnframt innflutningspartý í nýju húsnæði fyrirtækisins að Vatnagörðum 8, og sonur Eiríks, Kolbeinn Sæland, fagnaði sveinsprófi sínu í skrúðgarðyrkju.

Eiríkur sjálfur er garðyrkjufræðingur frá Garðyrkjuskólanum og sótti auk þess frekara nám í Noregi í faginu á sínum tíma.

Sælandsgarðar eru garðaþjónusta sem sérhæfir sig í slætti, trjá- og runnaklippingum, trjáfellingum, beðahreinsunum, hellulagningum og fleiru.

Sælandsfjölskyldan er mikil garðyrkjufjölskylda og ýmsir aðrir fjölskyldumeðlimir eru með græna fingur, til dæmis er bróðir Eiríks, Sveinn, í blómarækt og á eina af stærstu garðyrkjustöðvum á Íslandi, Espiflöt.

Notaleg stemning var í Vatnagörðum 8 á laugardaginn. Gestir nutu veitinga og röbbuðu saman, Einar Bárðarson var veislustjóri og skemmtilegar ræður voru fluttar. Myndir sem hér fylgja með fanga stemninguna.