Greint var frá því í vikunni að Neymar, leikmaður Paris Saint-Germain, væri með undarlega klásúlu í sínum samningi.

Franskir miðlar sögðu frá því að Neymar fengi vel greitt fyrir það eina að klappa fyrir stuðningsmönnum eftir leiki.

Neymar hefur nú sjálfur svarað fyrir þessar sögusagnir en hann birti færslu á Instagram og skrifar ‘fake news’.

Samkvæmt fregnunum fær Neymar allt að 375 þúsund evrur aukalega á mánuði fyrir að þakka fyrir sig eftir leiki.

Aðrir leikmenn eru þá einnig nefndir en fyrirliðinn Thiago Silva er sagður fá 33 þúsund evrur fyrir að gera það sama.

PSG hefur staðfest að leikmenn fái aukalega borgað fyrir það að haga sér vel en þvertekur þó fyrir það að það sé aðeins fyrir að klappa fyrir stuðningsmönnum sem mæta til leiks.

Leikmenn fá því bónusa fyrir að haga sér vel í hverjum mánuði en smáatriðin eru ekki gefin upp.