Heimir Guðjónsson þjálfari HB í Færeyjum er gestur í 90 mínútum, hlaðvarpsþætti okkar hér á 433.is. Þátturinn er í heild hér að neðan.

Heimir ræddi á meðal annars íslenska landsliðið sem hefur verið í brekku undir stjórn Erik Hamren undanfarið.

Heimir er ekki á því máli að partíið svokallaða sé búið en frammistaða liðsins hefur þó komið á óvart.

,,Ég held að partíið sé ekki búið. Það hefur verið mikil velgengni, við komumst á EM og svo HM,“ sagði Heimir.

,,Ég held að flestir geti verið sammála um það að HM hafi verið smá vonbrigði. Það voru forsendur til að gera aðeins betur.“

,,Samt líka í ljósi þess að Aron hafði verið meiddur og Gylfi ekki í sínu besta standi, svo ákveður Heimir að hætta og Erik tekur við með Frey.“

,,Báðir þessir menn vita alveg hvað þeir eru að gera og kunna að þjálfa en þegar nýir menn koma inn fylgja áherslubreytingar.“

,,Það hefur alltaf verið ákveðinn grunnur og þess vegna hafa úrslitin komið mér pínu á óvart.“

,,Fyrsti leikurinn sem Hamren var með gegn Sviss úti, ég horfði á hann í sjónvarpinu. Ég man þegar ég sá uppstillinguna á liðinu, gegn Sviss á útivelli, að spila 4-4-2 var svakalega djarft.“

,,Þetta var upprúllun frá upphafi til enda. Kannski ný hlið að henda bara inn hvíta handlæðinu sem kom á óvart.“

,,Það tekur tíma að vinda ofan af nýju liði. Að tapa 6-0 í landsleik er ekkert grín. Við erum enn að vinda ofan af þessu.“