Aron Einar Gunnarsson fyrirliði Íslands var í viðtali í Brenslunni á FM957 í morgun. Hann er að gefa út ævisögu sína og ræddi hana.

Sagan Mín er bók sem Aron Einar er að gefa út núna fyrir jólin. Þessi öflugi leikmaður er að snúa til baka eftir meiðsli og verður í íslenska landsliðshópnum sem mætir Belgíu og Katar í næstu viku.

,,Ég var alveg með fyrir og við unnum ekki leikina það er planið að snúa við blaðinu. Ég verð með í Belgíu,“ sagði Aron Einar.

Aron Einar var spurður út í erfiðustu andstæðinga sína á ferlinum og svör hans koma á óvart.

,,Ég held að það sé óvænt svar, þegar ég var 19 ára þá spilaði ég á móti Ballack, Það er einn erfiðasti gæi sem ég hef þurft að dekka, með landsliðinu er það Van Bommell. Það kemur á óvart því ég hef spilað gegn Messi, Ronaldo, Modric kemur þar á eftir. Það var erfitt að vera í kringum Van Bommell, hreyfingin og staðsetningar.“

Þegar komið var að ræða um bestu samherjana var svarið hins vegar ekki svo óvænt.

,,Ég myndi segja Gylfi með landsliðinu, Eiður er besti leikmaður sem ég hef spilað með, Gylfi er besti samherji. Við höfum þróað gott samstarf með landsliði.“

Aron Einar er frá Akureyri en eiginkona hans er frá höfuðborgarsvæðinu, hvar munu þau búa að ferli loknum?

,,Þetta eru samningaviðræður við konuna, sem ganga erfiðlega eins og er. Það var alltaf planið að klára ferilinn heima, mér finnst ég ekki búinn með þann part. Mig langar í Íslandsmeistaratitil, ég veit samt ekki hvort ég eigi eftir að hafa áhuga þegar ég er búinn úti. Mig langar í Íslandsmeistaratitil en ég veit ekki hvort ég muni gera það.“