35 ára maður var stunginn til bana í gærkvöldi í Haverslev í Himmerland á Norður-Jótlandi í Danmörku. Lögreglunni var tilkynnt um heiftarleg átök á bensínstöð í bænum um klukkan 21.30 í gærkvöldi. Þegar lögreglumenn komu á vettvang fundu þeir karlmann sem hafði verið stunginn með hníf. Læknir úrskurðaði manninn látinn klukkan 21.48.

Lögreglan lýsti snemma í morgun eftir tveimur grunuðum í málinum með því að birta nöfn þeirra og myndir af þeim. Mjög óvenjulegt er að danska lögreglan birti nöfn og myndir af grunuðum svo snemma í rannsóknarferlinu. Fólk er hvatt til að hafa samband við lögregluna ef það veit hvar mennirnir halda sig og er hvatt til að koma ekki nærri þeim sjálft. Mennirnir heita Kion Hjaltalin Bertelsen og Mohammed Omar Royeq.

Mörg vitni hafa verið yfirheyrð og vettvangsrannsókn hefur staðið yfir í alla nótt. Talsmaður lögreglunnar segir að lögreglan hafi góðar gögn í málinu og góða mynd af atburðarrásinni. Það sé aðeins tímaspursmál hvenær mennirnir finnast.

Á fjórða tímanum í nótt var tvítugur maður handtekinn í húsi í Álaborg en hann er grunaður í málinu. Lögreglan hefur ekki viljað segja neitt meira um hver hann er eða tengsl hans við málið.