Tayyip Erdogan, forseti Tyrklands hefur kallað eftir vopnahléi í átökum í héraðinu Idlib í norðaustur hluta Sýrlands. Eru rússneskar og sýrlenskar hersveitir að undirbúa sig undir árás á héraðið en talið er samkvæmt heimildum innan bandaríska varnarmálaráðuneytisins að um 30.000 uppreisnarmenn séu í héraðinu. Einnig telja Sameinuðu þjóðirnar að verði af árás inn í héraðið er búist við gífurlegu mannfalli saklausra íbúa svæðisins. Leiðtogar Tyrklands, Írans og Rússlands sitja nú á fundi í Tehran til að ræða ástandið í Idlib.

Rússar hafa hins vegar sagst vera á móti vopnahléi á svæðinu ásamt því að Hassan Rouhani, leiðtogi Írans, segir að Sýrland verði að ná stjórn á svæðinu. Hafa Rússar gert loftárásir á svæðið undanfarna daga ásamt því að sýrlenski stjórnarherinn hefur verið að skjóta úr fallbyssum á svæðið undanfarnar vikur en hafa aukið þá skothríð síðustu daga. Tyrkir sendu skriðdrekadeild á svæðið fyrr í vikunni og eru ráðamenn í Ankara áhyggjufullir að mikill flóttamannastraumur verði ef átökin stigmagnist á svæðinu.

Átökin í Sýrlandi hafa nú þegar kostað yfir eina milljón manns lífið ásamt því að 11 milljón manna hafa þurft að flýja landið vegna átakanna.