Fallegt augnablik fyrir leik Swansea og Chelsea í ensku úrvalsdeildinni í gær hefur vakið talsverða athygli í netheimum.

Á myndbandinu má sjá ungan stuðningsmann Swansea, sem varð þess heiðurs aðnjótandi að fylgja stjörnum velska liðsins inn á völlinn, vart trúa sínum eigin augum þegar hann sér íslenska landsliðsmanninn Gylfa Þór Sigurðsson.

Sá stutti er með stjörnur í augunum og kemur varla upp orði.

Gylfi er ein skærasta stjarnan í liði Swansea og hefur hann verið einn allra besti leikmaður liðsins á undanförnum árum. Leikurinn endaði með 2-2 jafntefli og skoraði Gylfi annað marka Swansea úr vítaspyrnu.

Myndbandið má sjá hér að neðan en ljóst er að þessi ungi stuðningsmaður mun seint gleyma þessu augnabliki.