Sadio Mane, leikmaður Senegal, sendi liðsfélaga sínum hjá Liverpool, Mohamed Salah skilaboð er þeir voru báðir á HM í Rússlandi.

Salah og félagar í Egyptalandi eru úr leik á mótinu eftir tap gegn Rússlandi og Úrúgvæ í riðlakeppninni.

Salah missti af fyrri leik Egypta gegn Úrúgvæ vegna meiðsla en hann var mjög tæpur fyrir mótið.

,,Ég sendi honum skilaboð fyrir viku síðan. Hann vildi mikið spila á þessu móti,“ sagði Mane.

,,Því miður mætti hann meiddur til leiks og ég óskaði honum alls hins besta. Hann er mjög andlega sterkur.“

,,Hann barðist hart og kom til baka til að hjálpa sínu landi. Því miður voru þeir í erfiðleikum en þú verður að lifa með því í fótboltaheiminum.“