Það eru nokkrir dagar í lífi fólks sem eru mikilvægari en aðrir. Dagurinn sem fólk giftir sig og dagurinn sem þau eignast barn teljast jafnan til þeirra daga. Það eru þó einnig stórtíðindi þegar systkini manns eignast börn og er oft erfitt að halda tilfinningunum og stoltinu leyndu þegar maður fær að verða stóra frænka eða frændi.
Það var því stór dagur í lífi systranna Emily Chell og Katie þegar sú fyrrnefnda fór af stað í fæðingu þremur vikum fyrir tímann á brúðkaupsdegi eldri systur sinnar.
Á laugardaginn síðasta var Emily stödd með systur sinni á hóteli að undirbúa brúðina fyrir athöfnina. Emily fór af stað í hríðar á föstudagskvöldið og fór hún í kjölfarið heim til sín. Fljótlega eftir miðnætti var hún keyrð á spítalann þar sem hún eignaðist son sinn klukkan tíu mínútur yfir sjö um morguninn.
Emily tók það ekki í mál að missa af stóra degi systur hennar og í staðin fyrir að hvíla sig eftir fæðinguna gerði hún sig klára og mætti með nýfæddan son sinn til þess að ganga með systur sinni að altarinu.
„Sem betur fer var fæðingin náttúruleg og við allrar lukku kom ekkert upp á. Við hvíldum okkur örlítið eftir fæðinguna en fórum svo af spítalanum klukkan 11:15 og keyrðum 20 kílómetra þar sem brúðkaupið var haldið,“ segir Emily í viðtali við Metro.
„Við hringdum á undan okkur svo ég fékk brúðarmeyju kjólinn minn og um leið og ég mætti á staðinn setti ég Brody í vöggu og hoppaði í kjólinn. Ég var tíu mínútum of sein en það biðu allir eftir okkur og gekk að altarinu með Brody í höndunum. Það fögnuðu allir þegar við gengum inn. Þetta var yndislegt augnablik.“
Emily grínaðist með það að Brody hefði einfaldlega ekki viljað missa af stóra deginum.
