Leikstjórinn Michael Cimino lést nýlega 77 ára að aldri. Hann er þekktastur fyrir myndina Deer Hunter frá árinu 1978 en hún vann til fimm Óskarsverðlauna, þar á meðal var hún valin besta mynd ársins og Cimino besti leikstjórinn. Robert De Niro, sem lék aðalhlutverkið í þeirri mynd, minntist leikstjórans og sagðist ætíð myndu muna eftir samvinnu þeirra. Myndin fjallaði um Víetnamstríðið og er mjög áhrifamikil.

Cimino, sem var fullkomnunarsinni og ekki auðveldur í samstarfi, leikstýrði alls átta kvikmyndum og starfaði einnig sem handritshöfundur. Hann sagði sjálfur að ef ekki væri vegna hvatningar Clint Eastwood hefði hann ekki komist áfram í kvikmyndabransanum. „Ég á Clint allt að þakka,“ sagði hann eitt sinn. Cimino var einn af handritshöfundum Magnum Force, sem var önnur Dirty Harry-myndin en Eastwood hlaut heimsfrægð fyrir leik sinn í myndunum um töffarann. Eastwood hafði mikla trú á Cimino og samþykkti að taka að sér aðalhlutverkið í fyrstu kvikmynd hans, Thunderbolt and Lightfoot. Myndin sló rækilega í gegn og eftir það virtust Cimino allir vegir færir.

Óskarinn var hátindur ferils hans en fallið var snöggt og hátt. Hann leikstýrði rándýrri stórmynd árið 1980, Heaven’s Gate, sem gagnrýnendur rifu í sig og einhverjir hvöttu leikstjórann til að skila Óskarsverðlaunum sínum. Áhorfendur höfðu ekki áhuga á að sjá myndina, en í dag á hún sína aðdáendur. Cimino leikstýrði einungis fjórum myndum eftir Heaven’s Gate, þeirri síðustu Sunchaser árið 1996.