Albert Guðmundsson, fyrirliði íslenska U21 árs landsliðsins, hefur bankað á dyrnar hjá aðalliði PSV Eindhoven í Hollandi og um helgina fiskaði hann víti í sigurleik gegn Heracles eftir að hafa komið inn á sem varamaður.
Albert, sem er fæddur árið 1997, hefur æft með aðalliði PSV í vetur en hefur þó oftar en ekki þurft að sætta sig við að koma inn á sem varamaður undir lok leikja.
Af þeirri ástæðu hefur hann spilað með varaliði PSV, PSV II, í næst efstu deild Hollands en Albert fór á kostum í þeirri deild í fyrra þegar hann skoraði 18 mörk í 34 leikjum. Það sem af er þessu tímabili hefur hann skorað þrjú mörk í þremur leikjum og líða að meðaltali á 80 mínútur á milli marka.
Hér að neðan má sjá svipmyndir af Alberti í leikjum PSV á tímabilinu, en YouTube-síðan PSV Edits tók saman. Myndbandið er ekki ýkja langt en á því má þó glögglega sjá hversu mikla hæfileika Albert hefur.
[youtube https://www.youtube.com/watch?v=iFNojIYDGiY&w=560&h=315]
