Hlébarði réðst á þriggja ára dreng, Elisha Nabugyere, í Queen Elizabeth þjóðgarðinum á föstudaginn og varð honum að bana og át hann. Starfsmenn þjóðgarðsins leita nú að hlébarðanum til að drepa hann en óttast er að hann ráðist aftur á fólk þar sem hann sé nú kominn á bragðið með að éta fólk.

Móðir Elisha, Doreen Ayera, starfar í þjóðgarðinum. Hún skildi Elisha eftir hjá barnfóstru í höfuðstöðvum þjóðgarðsins en þar er aðstaða til barnagæslu en engin girðing. Sky segir að talsmaður þjóðgarðsins hafi sagt að Elisha hafi elt barnfóstruna þegar hún fór úr aðalbyggingunni yfir í eldhúsið. Hún hafi ekki tekið eftir því að hann elti hana.

Hlébarðinn lá í leyni og réðst á drenginn og dró hann inn í runna. Þjóðgarðsverðir hófu þegar leit að Elisha en fundu ekki. Næsta morgun fundu þeir höfuðkúpu hans undir tré.

Talsmaðurinn sagði að þjóðgarðsverðir leiti hlébarðans nú því hann hafi nú bragðað mannablóð og gæti ráðist aftur á fólk.