Arsenal tók á móti Atletico Madrid í fyrri leik liðanna í undanúrslitum Evrópudeildarinnar í kvöld en leiknum lauk með 1-1 jafntefli.

Það dró til tíðinda strax á 10. mínútu þegar að Sime Vrsaljko, bakvörður Atletico Madrid fékk að líta sitt annað gula spjald og þar með rautt og gestirnir því einum færri frá tíundu mínútu.

Ekki batnaði ástandið hjá Atletico Madrid eftir þetta því skömmu síðar var Diego Simeone, stjóri Atletico Madrid sendur upp í stúku fyrir mótmæli.

Heimamenn settu góða pressu á gestina í fyrri hálfleik en Jan Oblak var öflugur í markinu og staðan því markalaus í leikhléi.

Það var svo Alexandre Lacazette sem braut ísinn fyrir Arsenal með laglegu skallamarki á 61. mínútu en markið kom eftir laglega sendingu frá Jack Wilshere.

Antoine Griezmann jafnaði hins vegar metin fyrir Atletico eftir mikinn vandræðagang í vörn heimamanna og lokatölur því 1-1.

Einkunnir úr leiknum frá Sky Sports má sjá hér fyrir neðan.

Arsenal: Ospina (6), Bellerin (7), Monreal (6), Koscielny (5), Mustafi (6), Wilshere (7), Xhaka (6), Ozil (6), Ramsey (7), Welbeck (7), Lacazette (7).

Atletico Madrid: Oblak (7), Vrsaljiko (3), Gimenez (7), Godin (8), Lucas (7), Correa (6), Saul (6), Partey (6), Koke (6), Gameiro (5), Griezmann (7).

Varamenn: Gabi (6), Savic (6).