Nú eru farnar að birtast skoðanakannanir vegna kosninganna sem verða eftir mánuð. En það er aðeins eitt ár síðan var kosið síðast. Eftir kosningarnar þá spannst nokkur umræða um skoðanakannanir, hversu marktækar þær væru, þá var líka rætt um misjafnt gildi skoðanakannana sem byggja á símhringingum og þeirra sem notast við netpanela svokallaða.
Hér eru tölur af fróðlegri Wikipediasíðu um kosningarnar 2016. Hún er á ensku, svona síður eru birtar um kosningar í fleiri löndum og eru mjög gagnlegar. Þarna eru teknar saman helstu skoðanakannanir. Listinn er mun lengri, en ég birti yfirlitið um skoðanakannanir sem gerðar voru mánuðinn fyrir kosningarnar.
Hér eru svo til samanburðar úrslit kosninganna 29. október 2016 í prósentum. Það sem vekur mesta athylgi er að Sjálfstæðisflokkurinn var mjög vanmældur, það er líka forvitnilegt að skoða muninn milli einstakra könnunarfyrirtækja, kíkjum til dæmis á MMR og Félagsvísindastofnun Háskólans. Píratar voru stöðugt ofmældir miðað við úrslit kosninganna og svo var það alveg fram á kjördag. Framsóknarflokkurinn var með ívið meira en skoðanakannanirnar gerðu ráð fyrir en VG aðeins minna, en munurinn er ekki ýkja mikill.
Nú höfum við fengið þrjár skoðanakannanir í röð þar sem Sjálfstæðisflokkurinn er mældur með um 23 prósent. En gæti verið að eitthvað svipað yrði uppi á teningnum og í kosningunum í fyrra? Svo má alltaf taka umræðuna um í hve miklum mæli skoðanakannanir eru skoðanamótandi.
