Alls staðar plast. Í höfum, á ströndum, úti á víðavangi, í dýrum og fiskum, og nú plastagnir í loftinu og í drykkjarvatni. Svo örsmáar að þær sjást ekki.

Guardian birtir þessa skýringarmynd um plast í drykkjarvatni. Í Þýskalandi fannst plast í öllum bjórtegundum sem voru prófaðar og líka í hungangi og sykri. En í Frakklandi mældu þeir plastagnir sem féllu úr loftinu og komust að því að allt að tíu tonn lentu á París árlega. Líklega hefur þetta ekki verið prófað sérstaklega á Íslandi – eða hvað?

Einn stærsti sökudólgurinn virðist vera fatnaður sem er búinn til úr plasti. Flísið. Það hefur verið afar vinsælt síðustu áratugi. Hér á Íslandi er gata sem meira að segja hefur verið kölluð Flísstræti í hálfkæringi. Flísið er vissulega hentugt og þægilegt og veitir skjól – en plastagnirnar tætast af því, meðal annars við þvotta og þurrkun, og lenda úti í náttúrunni.

Kannski ættum við að snúa aftur til náttúrulegra efna eins og ullar og bómullar – að minnsta kosti meðan við getum ekki haft hemil á þessum úrgangi?