Meira að segja Grikkir, sú mikla reykingaþjóð, eru farnir að merkja sígarettupakka með hroðalegum og hrollvekjandi myndum af afleiðingum reykinga. Þetta er sannarlega ekki aðlaðandi vara þar sem hún blasir við í hillum verslana. Það er reyndar líka farið að takmarka hvar tóbak er selt.

Það verður að segjast eins og er að hönnun margra sígarettupakka er býsna flott – sumar tegundir myndu jafnvel teljast vera sígild hönnun. En nú er það allt eyðilagt, það blasa við ónýt lungu, börn sem verða fyrir heilsutjóni vegna reykinga, sviðnar tær.

Mikil reykingamanneskja sagði reyndar við mig að myndin hér fyrir neðan væri photosjoppuð. Nei, sagði ég, hún er fót-ó-sjoppuð.

Einu sinni voru á sígarettuauglýsingum myndir af fallegu fólki, karlmannlegum mönnum og þokkafullum konum, við alls kyns innihaldsríka iðju. En nú er þetta veruleikinn. Hvenær verða settar myndir af ofurölvi fólki, börðum eiginkonum og skorpulifur á brennivínsflöskur? Það er verið að gera sígarettur útlægar víðast hvar en áfengisdýrkun er normið og menn keppast við að setja áfengi í flottar flöskur með fagurlega hönnuðum miðum.