Hér neðar á síðunni má sjá elsta húsið í miðbæ Reykjavíkur, byggt árið 1762, var hluti af innréttingum Skúla Magnússonar, þeirri stórmerku tilraun til að koma á iðnaði á Íslandi. Þá var húsið nefnt „kontor og magazinhús“. Á fyrri hluta 19. aldar var þetta aðsetur biskups, var þá kallað Biskupsstofan. Síðar bjó þarna Jens Sigurðsson, bróðir Jóns Sigurðssonar – sjálfur Jón mun hafa gist í þessu húsi.
Núna er þarna ferðamannaverslun undir nafninu Cintamani – kemur ekki á óvart.
Myndin er tekin af Hjálmtý Heiðdal árið 1969. Hann gaf mér góðfúslegt leyfi til að birta hana. Hún er í röð mynda sem Hjálmtýr tók þegar hann var nemandi í Konstindustriskólanum í Gautaborg. Verkefnið var að taka myndir af skiltum og útstillingum – og nú eru þetta merkilegar heimildir.
Á þessum tíma var þarna verslun Silla og Valda, þessir þjóðkunnu kaupmenn keyptu húsið 1926 og ráku þar verslun í hálfa öld. Um þetta leyti stóð veldi Sigurliða Kristjánssonar og Valdimars Þórðarssonar víða um borg með fjölda verslana og hinu þekkta kjörorði búðanna – „af ávöxtunum skulið þið þekkja þá“ sem sjá má í auglýsingunni hér að neðan. Silli og Valdi áttu eignir um alla borg, létu til dæmis byggja stórhýsið í Austurstræti 17 og verslunarmiðstöðina í Glæsibæ.
Á mynd Hjálmtýs má einmitt sjá ávextina í glugganum hjá Silla og Valda. Mér er í barnsminni að manni fannst pínu ævintýralegt að koma inn í þessar búðir. Gæti verið að við þyrftum fleiri svona verslanir í bæinn – að tími þeirra komi aftur?
Við hliðina glittir svo í Fjalaköttinn sáluga sem stóð hinum megin við Brattagötuna sem liggur upp í Grjótaþorp. Hann var rifinn og byggður afar ljótur steinsteypukumbaldi.
Seinna var í Aðalstræti 10 veitingastaður sem nefndist Fógetinn – ég man ekki betur en að þar hafi fengist bjórlíki – en um síðustu aldamót keypti Reykjavíkurborg húsið og var það þá fært aftur til fyrra horfs, en nýtt hús byggt þarna fyrir aftan.
Hér er svo önnur mynd úr verkefni Hjálmtýs Heiðdal. Hún er tekin fyrir utan sjoppu sem var neðarlega á Skólavörðustígnum. Þarna birtist nokkuð annar fjölmiðlaveruleiki en nú er. Vegfarendur taka sér stöðu við gluggann til að lesa forsíður blaða.
Þarna má greina Mánudagsblaðið, Ný Vikutíðindi, Nýja Dagsbrún, Nýtt land, en líka þekktari blöð eins og Þjóðviljann, Tímann og Morgunblaðið. Svo eru þarna tímarit eins og Vikan, Sannar Sögur, Eros og Satt. Fólk fékk sínar fréttir þótt ekki væru þær á internetinu.
Glöggur notandi vefsíðunnar Gamlar ljósmyndir fann svo forsíðuna á Nýjum vikutíðindum sem hangir þarna í glugganum. Þetta er blaðið sem kom út 11. júlí 1969. Það er margt athyglisvert að finna á forsíðunni, til dæmis fréttina neðst til vinstri um skort á gistiherbergjum. Og svo er þarna mynd af dansmærinni Sabinu sem um þessar mundir dansaði í Sigtúni við Austurvöll, að því er segir.
