Logi Einarsson, formaður Samfylkingarinnar, póstar þessari mynd á Facebook. Í henni felst væntanlega ósk um að aftur verði teknar upp viðræður um fimm flokka ríkisstjórn. Fimm í fjársjóðsleit Fagurey heitir bókin á íslensku.

Kannski er þetta óskhyggja hjá Loga, það er þó aldrei að vita. Bjarni Benediktsson sleit óvænt sambandinu við Viðreisn og Bjarta framtíð í gær og fór að tala við Katrínu Jakobsdóttur. Andstaðan við stjórn með Viðreisn og BF er talsverð innan þingliðs Sjálfstæðisflokksins og vandséð að þar gangi saman.

Hins vegar er vandinn við samtal Bjarna og Katrínar að varla neinn vill fara með þeim í stjórn nema þá væntanlega Framsóknarflokkurinn. Málefnalega gæti það gengið – en fyrir VG lítur það of mikið út eins og þau fari inn líkt og hækja fyrir sitjandi stjórn.

Bjarni mun hafa reynt að fá Bjarta framtíð með í þessar viðræður, en það gekk ekki. Heitin milli BF og Viðreisnar halda enn. Þá er næst að horfa til Samfylkingar, flokkurinn er í molum, hann þurrkaðist út í Reykjavík, er orðinn landsbyggðarflokkur á þingi, maður veit varla hver ræður ríkjum þar. Þeir eru til í flokknum sem gætu hugsað sér að fara í þetta stjórnarsamstarf, en tæplega fengi það mikinn hljómgrunn meðal almennra flokksmanna.

Og Logi formaður er, eins og sjá má af bókarkápunni sem hann birtir, enn að láta sig dreyma um fimm flokka ríkisstjórnina.