Það er af ótalmörgu skemmtilegu af taka í fyrstu Kilju haustsins sem er á dagskrá RÚV á miðvikudagskvöld, ekki laust við að maður hlakki til að takast á við staflann.

Við skoðum óborgalegu bók Forystufé eftir Ásgeir Jónsson frá Gottorp, verk sem má kalla ástaróð til íslensku sauðkindarinnar. Hún er nú endurútgefin í veglegri útgáfu hjá bókaforlaginu Sæmundi.

Við skoðum nýjar bækur eftir Þórarin Eldjárn, Ásdísi Thoroddsen og Guðmund Óskarsson. Þórarinn er með smásagnasafnið Sögur af séra Þórarinum, Ásdís með skáldsöguna Utan þjónustusvæðis og Guðmundur með sögu sem nefnist Villisumar – gerist í Frakklandi á árunum milli 1950 og 1960 og er mjög ólík Bankster sem hann fékk íslensku bókmenntaverðlaunin fyrir.

Við fjöllum um teiknarann snjalla Halldór Pétursson, en um þessar mundir eru liðin 100 ár frá fæðingu hans. Halldór var frægur fyrir skopmyndir, mannamyndir, myndir af hestum og myndskreytingar í bókum sem allir þekktu á sínum tíma, eins og til dæmis Vísnabókinni og Skólaljóðunum.

Loks leitum við að Gunnarshólma og teljum okkur finna hann samkvæmt leiðbeiningum heimamanna í Fljótshlíð. Þ.e. hinn rétta Gunnarshólma, ekki þann sem er sýndur ferðamönnum.