Almennt má segja að alltof mikið sé gert úr skoðanakönnunum í íslenskum fjölmiðlum. Þetta eru fréttir sem fjölmiðlarnir fá sendar á tölvutæku formi og þarf lítið að gera til að matreiða þær. Auðvelt að sjóða eitthvað könnununum og útheimtir litla hugsun. Hringja kannski í einn til tvo stjórnmálafræðinga sem lesa rétt sem snöggvast í tölurnar og segja tíðindi sem oftastnær eru almælt.

Eins og oftast áður fáum við að upplifa þetta fyrir kosningarnar í lok október. Það verður lítill friður fyrir skoðanakönnunum. Einhver stingur jafnvel upp á því að bannað verði að birta skoðanakannanir í ákveðinn tíma fyrir kosningar, en að vanda fær það dræmar undirtektir.

En hvað með að birta og blása upp úr öllu valdi skoðanakannanir sem eru augljóslega skrítnar og líklega meingallaðar hvað framkvæmdina varðar?

Þetta virðist vera raunin með skoðanakönnun Fréttablaðsins frá því í morgun. Hefur reyndar virst vera tilhneiging í fleiri könnunum frá Fréttablaðinu. Þær virka út úr kú. En samt hlaupa fjölmiðlarnir á eftir þessu eins og hænsn. Getur verið að það sé ábyrgðarhluti? Skoðanakannanir eru jú skoðanamótandi á sinn hátt, líka þær vitlausu sem er vandi að leiðrétta þegar þær eru komnar í birtingu út um allt.