Sigmundi Davíð virðist vera að takast að sameina stuðningsfólk meirihlutaflokkanna í Reykjavík bak við hugmyndina um að byggja sem stærst og einsleitast í miðbæ Reykjavíkur.

Það gerir hann með því einfaldlega að vera á annarri skoðun. Talsverður hópur fólks hefur núorðið þá merkilegu skoðun að vera aldrei sammála skoðunum Sigmundar Davíðs. Allt sem hann segir er eðli málsins samkvæmt vont og vitlaust.

Fyrir stuttu var ýmsum mikið niðri fyrir vegna hótelvæðingarinnar í Miðbænum. Fólk fann allt því til foráttu að byggð yrðu fleiri hótel og stórhýsi.

Það var til dæmis áberandi hversu mörgum var í nöp við var Höfðaturninn – sem var talinn eins konar tákn um gróðæri.

Nú er komið nýtt gróðæri. Alls staðar byggingarkranar á lofti. En af því Sigmundur Davíð varar við þessu, eru ýmsir sem áður voru á móti hótelvæðingu og stórbyggingum orðnir miklir framkvæmdasinnar og sjá ekkert að því að byggja sem mest og stærst.