Það var reynt að koma því á kreik að áætlanir um að stytta opnunartíma veitingahúss sem heitir Q-bar væru liður í ofsóknum gegn samkynhneigðum!

Þetta fékk sitt pláss í fjölmiðlum.

Nú eru fréttir um að nokkur hundruð manns hafi skrifað undir áskorun þess efnis að ekki megi stytta tímann sem þessi staður er opinn. Því er líkt við mannréttindabrot.

Það er dálítið verðbólgin orðanotkun.

Það sem gerðist var einfaldlega það að veitingahús sem teygir sig nokkuð inn í íbúðarhverfi fór að hafa opið til hálf sex á morgnana í staðinn fyrir þrjú áður. Þarna var áður ölkrá og kaffihús, nú er þar diskótek.

Á sama tíma stendur til að stytta opnunartíma veitingahúsa í bænum sem eru þekkt athvarf fyrir dópista og sídrykkjufólk. Þessi veitingahús eru beint framhald af Keisaranum gamla sem var á sínum tíma flæmdur af Hlemminum – með viðdvöl á Kaffi Skít svokölluðum í Austurstræti. Nú eiga þessir staðir ekki að fá að hafa opið lengur yfir daginn.

Þá er auðvitað spurning hvert vesalings fólkið fer. En kannski á það ekki heima á miðjum Laugaveginum?