Bónus, Hagkaup og 10/11 eru í eigu sömu manna.

Ég held það séu mestanpart sömu vörutegundir sem fást í þessum búðum, keyptar í gegnum sama fyrirtæki sem mun heita Aðföng – og er í eigu sömu manna.

Matvaran er best í Hagkaupum – oft er hún býsna léleg í bæði 10/11 og Bónus. Þá meina ég grænmetið og ávextina.

Ódýrast er að versla í Bónus, dýrast í 10/11.

Varla er það vegna þess að vöruúrvalið er svo gott í 10/11 eða þjónustan svo góð.

Í 10/11 fæst hérumbil ekki neitt nema snakk og örbylgjumatur – jú, pínulítið af ónýtum ávöxtum – en þjónustan samanstendur af einum til tveimur unglingum á hverja búð.

Af umræðu undanfarinna daga skilst mér að í kerfinu hjá Baugi/Högum sé gert ráð fyrir ákveðnum – föstum – verðmun milli þessara búða.

Ég hef tekið eftir því að lítersplastflösku af Sól ávaxtasafa er hægt að fá fyrir að mig minnir 265 krónur í Bónus.

Þegar ég gáði síðast í 10/11 kostaði nákvæmlega eins flaska 414 krónur.

Ég er afar lélegur í reikningi, mér sýnist munurinn vera 56 prósent.

Er þetta hinn fasti verðmunur? Stafar hann af mismunandi dýrum rekstri eða er þetta einungis huglægt?