Í ræktinni var kveikt á Sky News, sjónvarpsstöð sem ég sé annars aldrei. Ég fór að horfa vegna þess að verið var að sýna viðtal við Ron Wood, gítarleikara Rolling Stones.
Ron Wood á mjög merkilegan feril í tónlist. Hann var í frægri en nokkuð vanmetinni hjómsveit sem hét Faces. Hann stjórnaði tónlistarflutningi á fyrstu sólóplötum Rod Stewarts. Þær voru meistaraverk – margir telja að bandið sem þar lék sé eitt hið besta í sögu rokksins. Hann spilaði í hljómsveit Jeffs Beck. Hann hefur leikið með Rolling Stones síðan 1975. Er nú að gefa út ævisögu sína.
Spyrillinn spurði Ronnie um Amy Winehouse. Spurði aftur – þá líka um Amy Winehouse.
Tattóveraða stelpuskjátu sem hefur verið vinsæl í sirka fimmtán mínútur.
Mér finnst að þá hefði Ronnie átt að ganga út.
