Þegar ég var ungur blaðamaður á blaði sem hét NT – og var tilraun til að hleypa lífi í gamla Tímann – var Baldur Kristjánsson, nú séra í Þorlákshöfn, stjórnmálaskýrandi á stassjóninni. Hann átti marga fantagóða spretti.

Baldur rifjar upp gamla takta í pistli um Framsóknarflokkinn og fleira smálegt úr stjórnmálunum. Greinin ber yfirskriftina Leitin að framsóknarmönnum stigmagnast:

„Bjarni Harðarson heldur því fram hér á Moggablogginu að Perúindíánar séu Framsóknarmenn. Sama segir hann um Amazonindíána.. Bjarni fór alla leið til Perú að leita að Framsóknarmönnum greinilega og verður býsa vel ágengt að eigin dómi. Vonandi kvisast þetta ekki til þessara ættbálka, meðan hann er þar, hvað hann ætlar þessu fólki.“

Annars titlar Baldur sig sem „frjálslyndan jafnaðarmann“ á bloggi sínu. Þýðir það að hann hefur sagt skilið við Framsókn þar sem hann hefur alið mestallan pólitískan aldur sinn – nema auðvitað tímann þegar hann var í Framboðsflokknum ungur maður, sælla minninga?

En ef ég man rétt var Bjarni Harðar líka með okkur Baldri í vistinni hjá Framsókn á þessu merka blaði, NT. Það er dálítil framsókn í okkur öllum.