Samkvæmt Morgunblaðinu eru þetta menn sem Eva Joly hefur fengið til að aðstoða við rannsókn hrunsins. Það er ljóst að það er algjörlega nauðsynlegt að nota erlenda sérfræðinga í þessu risavaxna máli.

 „Berg er menntaður lögfræðingur og löggiltur endurskoðandi og hefur unnið við nokkur stærstu skatta- og efnahagsbrotamál í Noregi undanfarin ár auk rannsóknar á eftirlaunamálum norskra stjórnmálamanna, sem voru mjög til umfjöllunar síðastliðinn vetur. Hann starfaði um tíma hjá norsku efnahagsbrotadeildinni (Økokrim) en rekur nú eigin lögfræðistofu (LYNX) ásamt fleirum. Auk Bergs hefur Joly fengið franska endurskoðandann Jean-Michel Matt til rannsóknarinnar, en hann er þekktur fyrir aðkomu sína að rannsóknum mála á borð við Credit Lyonnais og Elf-rannsóknirnar.„

Berg heitir fullu nafni Helge Skogseth Berg og hann segir að hrun íslensku bankanna sé stærra mál en Enron og World.com.

Ég veit að fyrr á árinu var rætt um aðkomu konu sem heitir Helen Garlick að málinu. Hún er fyrrverandi aðstoðarforstjóri Serious Fraud Office í London. Garlick fór með eitt stærsta fjársvikamál Bretlands, mál British Aerospace, sem var Tony Blair stöðvaði vegna „þjóðarhagsmuna“.