Nú er farið að dreifa í hús bæklingnum þar sem þjóðaratkvæðagreiðslan um tillögur Stjórnlagaráðs er kynnt. Manni sýnist þetta vera húðvandað – það var Lagastofnun Háskóla Íslands sem setti saman textann.

Bæklingurinn er settur upp þannig að í öðrum dálkinum eru tillögur Stjórnlagaráðsins – og í hinum stjórnarskrá lýðveldisins eins og hún er núna. Sums staðar eru reyndar auðir spaltar þar sem gamla stjórnarskrá er og annars staðar hún mjög stuttaraleg. Skýringar eru þarna líka þar sem er farið nánar í álitaefni.

Guðni Th. Jóhannesson sagnfræðingur sem tók þátt í umræðu í Silfri Egils í gær hefur kallað stjórnarskrána frá 1944 bráðabirgðaplagg. Og vissulega virkar hún sumstaðar hálfköruð – nánast eins og bygging án þaks og glugga – við vitum líka úr stjórnmálabaráttunni að í henni eru ákvæði sem stangast á innbyrðis. Nýja stjórnarskráin er orðmörg miðað við þetta, en þá er þess að geta að þýska stjórnarskráin – sem þykir til sérstakrar fyrirmyndar – er ansi ítarleg.

Þessi bæklingur ætti að geta orðið undirstaða efnismikillar umræðu um stjórnarskrármál – Íslendingar hafa örugglega gott af að hugsa dálítið heimspekilega um tilveru sína.

En svo getum við auðvitað kosið að eyða tíma okkar í annað…

Bæklingurinn um þjóðaratkvæðagreiðsluna 20. október. Hann er líka hægt að nálgast á slóðinni Þjóðaratkvæði.